HILLSONG бол Есүст итгэдэг, Бурханыг болон хүмүүсийг хайрладаг чуулган.

Хан-Уул дүүргийн 8 дугаар хороонд байрлах “Илчлэлт” сүмийн дэргэдэх хүүхдийн зургийн дугуйлангийн нэг сарын ажлын үр дүнг харуулсан “Бяцхан зураачдын ертөнцөөр” тайлант үзэсгэлэн амжилттай зохион байгуулагдлаа.

Тус үзэсгэлэнд дугуйлангийн 14 суралцагч оролцож, өөрсдийн бүтээсэн өнгө будгийн баялаг ертөнцийг гэр бүл, дотны хүмүүстэйгээ хуваалцсан юм. Ердөө ганцхан сарын хугацаанд хүүхдүүд авьяас чадвараа нээн хөгжүүлж, сонирхолтой, өвөрмөц уран бүтээлүүд туурвисан нь арга хэмжээний онцлох хэсэг байлаа.

Арга хэмжээний үеэр зургийн багш Шүрэнцэцэг “Уран зураг хүүхдийн төлөвшил, сурах идэвхд хэрхэн нөлөөлдөг вэ?” сэдвээр эцэг эхчүүдэд зориулсан мэдээлэл, зөвлөгөө өгсөн бол сүмийн ахлагч Л.Болор-Эрдэнэ “Илчлэлт” сүмийн үйл ажиллагаа болон Библийн үнэ цэнийн талаар танилцуулга хийлээ.

Тус зургийн дугуйлан 6–16 насны хүүхдүүдийг хоёр насны ангиллаар хүлээн авч, өглөө болон оройн ээлжээр хичээллэж байгаа билээ.

Хэрэв та тус дугуйланд хүүхдээ бүртгүүлэхийг хүсвэл 9564-8315, 9507-6599 холбогдоорой.

Хаяг : Хан-Уул дүүргийн 8 дугаар хороо, 5 дугаар гудамж, 261 тоот
(60 дугаар сургуулийн баруун талд, “Илчлэлт” сүм)

Харилцаа Холбооны хэлтэс 2026.04.20.

2026 оны дөрөвдүгээр сарын 7-ноос 11-ний өдрүүдэд Солонгос улсаас ирсэн эрүүл мэндийн үйлчлэлчээр олон хүнд баярт мэдээ түгээсэн эмч Хан Жун Сог хүрэлцэн ирж, Архангай сүмд үйлчиллээ.

Тус үйл ажиллагаанд Баянхайр сүмийн 3 гишүүн, Дархан сүмээс 5 сайн дурын үйлчлэгч, Эхлэл сүмээс 1 хүн оролцож, орчуулагч Пастор Э.Цолмонбаярын хамт нийт 11 хүний бүрэлдэхүүнтэй баг ажиллалаа.

Өдөр бүр 90-100 хүн үйл ажиллагаанд хамрагдсан бөгөөд тэднээс 35 хүн сүмд ирж Библи судлахаар шийдвэр гаргасан нь онцлох үр дүн байлаа.

Энэхүү арга хэмжээ нь орон нутгийн иргэдэд эрүүл мэндийн дэмжлэг үзүүлсэн чухал үйл явдал болсон юм.

Мөн “Итгэл нь сонсохоос, сонсох нь Христийн үгээр ирдэг” (Ром 10:17) хэмээх ишлэлтэй адил энэхүү арга хэмжээ нь оролцогчдын итгэлийг бэхжүүлж, шинэ хүмүүсийг Библи судлахад уриалсан чухал үйл явдал боллоо.

Харилцаа Холбооны хэлтэс 2026.04.16

Налайх дүүргийн Долоо дахь өдрийн Адвентист сүм жил бүрийн уламжлалын дагуу Казах ард түмний үндэсний баяр болох Наурызын баярыг тэмдэглэн өнгөрүүллээ. Тус сүмийн гишүүдийн 50 орчим хувийг казах үндэстэн бүрдүүлдэг онцлогтой юм.

Наурызын баяр нь жил бүрийн гуравдугаар сарын 22-нд тохиодог бөгөөд ахмад настнаа хүндэтгэх, домбор хөгжмийн аялгуунд наадах, залуус бүргэдээр ан хийх зэрэг өв уламжлалаа хадгалан тэмдэглэдгээрээ онцлогтой. Мөн энэ өдөр хүмүүс үндэсний гоёмсог хувцсаа өмсөн, бие биедээ хүндэтгэл үзүүлж, архи согтууруулах ундаанаас татгалзан, өдөр шөнө тэнцэхийг бэлгэдэн урин хаврыг угтдаг байна.

Налайхын Адвентист сүмийн хамт олон энэхүү баярыг Бурханы хайр, нөхөрлөлийн уур амьсгал дор тэмдэглэдэг уламжлалтай. Ялангуяа казах хүүхдүүд өглөө бүр “Сайн байна уу” хэмээн мэндчилэн залбирах болсон нь тэдний хүмүүжил, итгэл үнэмшилд эерэг өөрчлөлт гарч байгааг харуулж байна хэмээн сүмийнхэн онцолжээ.

Түүнчлэн хүүхэд, залуус Есүсийн цуглаанд оролцож, магтан дуу дуулан, хамтын залбирал өргөж, нөхөрлөлөө бэхжүүлдэг нь онцгой ач холбогдолтойг дурдсан байна.

Сүмийн зүгээс итгэгчид болон олон нийтэд хандан Налайх дахь казах иргэдийн төлөө залбирч байхыг уриаллаа.

 Харилцаа Холбооны хэлтэс 2026.04.13