Нийтлэл

Өнгөрсөн Баасан гарагт буюу 1 дүгээр сарын 30-ны өдөр МАЧ-ны хамт олон дурсамж дүүрэн, утга төгөлдөр мөчийг өнгөрүүлсэн байна. Хамтдаа инээж, хөдөлмөрлөж, нэгэн зорилгын төлөө мөр зэрэгцэн алхсан өдрүүдээ эргэн дурсаж, байгууллагын хөгжил дэвшилд сэтгэл зүрх, хүч хөдөлмөрөө зориулсан эрхэм ажилтнуудаа хүндэтгэл, талархлын үгсийн хамт үдэн гаргаж, шинэ замнал руу алхахад нь ерөөл өргөлөө.

Ажлаа хүлээлгэн өгч байгаа Д.Отгонтөгс, Ц.Ариунаа, С.Мөнхжаргал нар чин сэтгэлийн үгээ хуваалцсан нандин мөч байлаа. Мөн шинээр үүрэг хариуцлага хүлээн авч, шинэхэн эрч хүч, итгэл найдвар тээж ирсэн ажилтнууддаа амжилт хүслээ.  

Энэхүү ёслол нь өнгөрснийг хүндэтгэн талархах, ирээдүйг итгэл дүүрэн угтах, хамтын нэгдэл, нөхөрлөлийн үнэ цэнийг мэдрүүлсэн сэтгэлд хоногших сайхан үйл явдал боллоо.

Та бүхний оруулсан хувь нэмэр, зориулсан сэтгэл, хийж бүтээсэн бүхэн МАЧ-ны түүхийн нэгэн үнэт хуудас болон үлдэнэ. Цаашдын ажил, амьдралын замд тань амжилт бүтээл арвин, эрүүл энх, аз жаргал, сайн сайхан бүхэн үргэлж хамт байх болтугай.

Харилцаа Холбооны Хэлтэс 2026.02.03

2026 оны 1-р сард “Эхлэл” сүм зөвлөлийн хурлаа зохион байгуулан, сүмийн үйл ажиллагааг удирдан чиглүүлэх ажилтнууддаа сонгон томиллоо. Бид энэ шинэ жилийг Бурханы ивээл дор итгэл дүүрэн угтаж, чуулганаа өсгөн бэхжүүлж, олон хүнд сайн мэдээг хүргэх зорилт тавин ажиллаж байна.

Энэ онд бид эрүүл мэндийн үйлчлэлийг түлхүү хэрэгжүүлж, айл өрхөөр айлчилж, тунгги алтан зүү, хөлийн массаж зэрэг үйлчилгээгээр дамжуулан хүмүүст хайр, халамж, найдвар түгээхээр зорьж байна. “Учир нь өлсөж байхад минь та нар Надад идэх юм өгсөн. Цангаж байхад минь уух юм өгсөн, харь хүн байхад минь урьж оруулсан, нүцгэн байхад минь Намайг хувцасласан, өвчтэй байхад минь Намайг эргэж байсан, горонд байхад минь Над дээр ирсэн билээ.”(Матай 25:35-36) гэж бичсэний дагуу бусдад үйлчлэх нь Христэд үйлчилж буй хэрэг билээ.

Эхлэл сүм 2026 онд дараах бүрэлдэхүүнтэйгээр Бурханы ажилд хамтран зүтгэнэ.

Пастор – Б.Оюунтуяа

Сүмийн ахлагч – Н.Амгалан

Шаббат зохион байгуулагч – Н.Халиун

Библийн ажилтан – А.Ариунжаргал, Н.Цээнээ

Хүүхдийн үйлчлэл – А.Энхжин, Дөлгөөнтамир

Эрүүл мэндийн үйлчлэл – Батчулуун

Ахмад эмэгтэйчүүдийн үйлчлэл – Ц.Мандах, Сүхбаатар тус тус томилогдоод байна.

Хотын түгжрэл, завгүй амьдрал хүмүүсийн идэвх, итгэлд нөлөөлж буй энэ цаг үед бид Есүсийн жишээг даган : “Өдөр бүр тэд нэг сэтгэлээр сумд цугладаг байсан ба айл айлд талх хуваалцаж, баяр хөөртэй, цэвэр сэтгэлээр хооллоцгоож Бурханыг магтан хамаг ардын хайр хүндлэлийн олж байв. Эзэн, аврагдагсдыг тэдэн дээр өдрөөс өдөрт нэмэгдүүлж байлаа (Үйлс 2:46-47) гэдэг үгийн дагуу айлаас айлд айлчилж, сайн мэдээг түгээж, сүмээ өсгөн бэхжүүлэх зорилт тавин ажиллаж байна.

Мөн шинэ сүмийн барилга баригдах үйлсийг дэмжин, гишүүдээ нэгдсэн залбиралд уриалж байна.

2026 онд бидний зорилго бол сүмээ улам дүүргэж, гишүүдийн тоог нэмэгдүүлэн, Христийн хайрыг олон хүнд хүргэж, амьд итгэлийн гэрэл болохоор зорьж байна.  Бурхан та бүхний алхам бүрийг удирдан, элбэг үр жимс авчрах болтугай.

Харилцаа Холбооны Хэлтэс 2026.02.03

Мэдээ бэлтгэсэн : Ц.Хишигжаргал

Энэ жилээс Баянхайр сүм сар бүрийн сүүлийн Шаббат өдрийг “Баярын мэдээний Шаббат” болгон тэмдэглэх зорилт тавьжээ. Энэхүү зорилгын хүрээнд 2026 оны 1 сарын 31-нд анхны Баярын мэдээний Шаббатаа амжилттай зохион байгууллаа.

Сүмийн хөтөлбөр өмнөхөөсөө ялгаатай, шинэчлэгдсэн байдлаар явагдаж, шинэ хүмүүст ойлгомжтой, сонирхол татам болжээ. Гишүүд ойр дотны найз нөхөд, ах дүүсээ дагуулж ирснээр 7–8 шинэ хүн цуглаанд хамрагдсан нь сүмийн уур амьсгалд шинэ амьдрал, урам зориг нэмсэн юм. Номлол, магтан дуу бүхэн Баярын мэдээний уур амьсгалд нийцүүлэн бэлтгэгдсэн байлаа.

Цуглааны дараа усан баталгааны ёслол болж, Ангелос оюутан миссионер сургалтын төвийн оюутан Балжинням Их Эзэнийг дагахаар шийдвэр гаргав. Энэ үеэр санаанд ч оромгүй нэг үйл явдал болсон нь Эзэн Бурханы дуудлагаар сүмд яваад удаагүй ч эртнээс Их Эзэнийг мэддэг болсон Эрдэнэбаяр усан баталгаа хүртэж, хамтдаа Их Эзэний хаанчлалд нэгдсэн явдал байлаа.

Сүмийн үйлчлэлийн баг болон нийт гишүүд энэ гайхалтай хамтын үйлчлэлд нэгдсэнээр Хаанчлалын сайн мэдээг түгээх, олон хүнийг Эзэн Бурханд хөтлөх үйлсээ амжилттай хэрэгжүүллээ.

Энэ жил Баянхайр сүмийн зөвлөл 9 хүний бүрэлдэхүүнтэйгээр чиглүүлэн ажиллахаар болсон байна. Сүмийн үйл ажиллагааг удирдан зохион байгуулах энэхүү зөвлөлд:

Сайн дурын ахлагч – Х. Гандолгор

Эрэгтэй туслах – О. Даш

Хүүхдийн багш – С. Ганцэцэг

Шаббат зохион байгуулагч – Т. Шүрэнцэцэг

Санхүүч – З. Нарангарав

Нарийн бичиг – М. Мөнгөнжигүүр

Ахмадын ахлагч – С. Шийтэр

Залуучуудын ахлагч – О. Сувд-Эрдэнэ

Сүмийн пастор – Э. Цолмонбаяр

Тэд бүгд өөрсдийн үүрэг, хариуцлагад үнэнчээр зүтгэж, сүмийн үйлчлэлийг Бурханд таатай, нэгдсэн зорилгоор удирдан чиглүүлнэ.

Та бүхний үйлчлэл Бурханд таатай, анхилуун үнэртэй өргөгдөх болтугай!

Харилцаа Холбооны Хэлтэс 2026 он

“Эцэст нь бүгд эв найртай, энэрэнгүй, ахан дүүсэг эелдэг бөгөөд даруу байцгаа. Ерөөлийг өвлөхөөр дуудагдсан тул та нар мууг муугаар, эсвэл доромжлолыг доромжлолоор хариулахын оронд ерөөгтүн. /1 Петр 3:8–9/ Энэхүү үгийн дагуу Булган сүмийн ахан дүүсийн хайр, эв нэгдэл, бие биеэ халамжлахыг эрхэмлэн, үйлчлэл нь тогтмол, идэвхтэй, үр өгөөжтэйгээр явагдаж байна.

Булган сүмийн итгэлийн ахан дүүс Шаббат өдрийн хүндэтгэлийн цуглааны өмнө нэг гишүүндээ талархал илэрхийлж, хамтдаа залбирдаг цагийг тогтмолжуулсан нь гайхалтай үйлчлэл болж байна.  Энэ нь гишүүдийн харилцаа, нөхөрлөлийг бэхжүүлж, сүнслэг нэгдлийг улам гүнзгийрүүлсэн ерөөлтэй алхам боллоо. Тус сүмийн Зөвлөлийн бүрэлдэхүүнд Амаржаргал, Нэргүй, Бийраа, Эрхэмбаяр, Соёлмаа, Алтанцэцэг, Байгалмаа, Мөнхжаргал тус тус сонгогдон Эзэнд үйлчлэхээр томилогджээ.

Харин хариуцсан үйлчлэлийн бүрэлдэхүүнд :

Шаббат зохион байгуулагч – Нэргүй

Санхүүч – Байгалмаа

Эмэгтэйчүүдийн ахлагч – Мөнхжаргал

Хүүхдийн багш – Гантигмаа нар сонгогдон өөрсдийн үүрэг, хариуцлагад үнэнчээр зүтгэж, Бурханы ажлыг чин сэтгэлээсээ дэмжин ажиллаж байна.

1-р сард тус сүмийн ахан дүүс 10 өдрийн залбирал зохион байгуулж, Шаббат хичээлийн номыг пэйж болон группт тогтмол уншиж, хуваалцжээ. Тэд 7 хоног бүрийн 2 дахь өдөр Библи судлалаа хийн, 3 дахь өдөр Хүүхдийн цуглааныг тогтмолжуулан, 4 дахь өдөр Сүмийн цэвэрлэгээ үйлчилгээнд илүүтэй анхаарч байна.

Мөн долоо хоног бүр хоёр айлд айлчлал хийж, гишүүдийн холбоо, халамж, нөхөрлөлийг бэхжүүлснээр Эзэний хайр бидний дунд үргэлж оршиж, хамт байгааг бодитоор мэдрүүлж байна.

1-р сард 2 шинэ хүн сүмд нэгдэж, шинэ гишүүний анги үргэлжлэн хичээллэж байна. Гишүүд бие биедээ туслан бууз хийж, сар шинийн бэлтгэлээ хамтдаа базаан, харилцан зочилж нөхөрлөснөөр сүмийн уур амьсгал улам дулаан, хайр дүүрэн болж байна.

Хүйтний улиралд сүмийн барилгад тодорхой гэмтэл гарсан ч гишүүд нэг санаа, нэг зүрх сэтгэлээр нэгдэн, өөрсдийн хөрөнгө хүчээр засвар хийж, сүмийн үйл ажиллагааг хэвийн үргэлжлүүлэх боломжийг бүрдүүлсэн нь ахан дүүсийн жинхэнэ хайр, хамтын ажиллагааны илэрхийлэл байлаа.

МАЧ-аас өгсөн будааг гишүүн бүрт тарааж, айлчлалын үеэр хэрэгцээтэй айлуудад бүрэн хүргэлээ.

Номлол, Их цэвэрлэгээ, Шаббат өдрийн хоолны хуваариудыг гарган нэгдсэн зохион байгуулалтад орж, гишүүд өөрсдөө бэлтгэн үйлчилснээр идэвх оролцоо нэмэгдэж, үйл ажиллагаа илүү үр өгөөжтэй болж байна.

Эзэн Бурханы ивээл дор бид ахан дүүсийн нэгдэл, хайрыг эрхэмлэн, цаашид ч итгэл дүүрэн үйлчлэхийг зорьж байна.

Харилцаа Холбооны Хэлтэс 2026 он

Өмнөговь аймгийн төв Даланзадгад хотод Есүс Христийн хаанчлал дэлгэрэх таатай нөхцөл, боломж бүрдлээ. Бичээст “Эзэний Сүнс хаана байна, тэнд эрх чөлөө байдаг (2 Коринт 3:17) гэж бичсэнчлэн Эзэн Бурханы ивээлээр дахин үүд хаалга нээгдэж, үйлчлэл тэлж байна.

Өмнөговь аймагт Пастор Б.Алтанбаатар болон гэргий Б.Болортуяа нар томилогдон ирж, Даланзадгад сумын 3-р багт байрлах Говь Сэндс зочид буудлын 2 давхрын 205 тоот өрөөг тохижуулан, сүмийн үйл ажиллагаа явуулах байраа бүрэн шийдвэрлэж чадсан нь Эзэний удирдамж, ивээлийн бодит илрэл юм.

Хан-Уул дүүргийн 3-р хороонд байрлах “Авралын гэрэл” сүмийн ахан дүүс Крисмас баярын үеэр тусламж хэрэгтэй 10 айлд хүнс болон эд зүйлийн туслалцаа үзүүлжээ. Энэхүү үйлчлэл нь баярын өдрүүдээр бусдын амьдралд гэрэл, итгэл найдвар түгээх зорилгыг өвөртөлжээ.

Мөн сүмийн ахан дүүс хувь хүний санаачилгаар үүсгэн байгуулагдсан “Жаргалант эдлэн” асрамжийн газарт Шинэ жилийн баярыг тохиолдуулан хүнс цуглуулж, бодит дэмжлэг үзүүлсэн байна. Тус асрамжийн газарт эргэж тойрох харж асрах хүнгүй, тэр дундаа хөгжлийн бэрхшээлтэй, хэвтрийн ахмад настнууд амьдардаг бөгөөд тэдэнд Бурханы ивээл, хайрыг бодитоор хуваалцжээ.

Тус сүмийн гишүүн Мэндцэцэг өмнө нь ч мөн адил 60 гаруй ахмад настанд чин сэтгэлийн үйлчлэл үзүүлж байсан билээ. Энэ удаад ч сүмийн гишүүд зөвхөн хүнсний тусламж үзүүлээд зогсохгүй, биечлэн үйлчилж, Бурханы хайрын талаар хуваалцсан нь ахмад настнуудын сэтгэлд гүн хүрчээ.

Саяхан “Авралын гэрэл” сүмийнхэн Төв сүмийн гишүүдтэй хамтран уг асрамжийн газарт дахин очиж, хамтарсан үйлчлэл хийжээ. Энэхүү хамтын ажиллагаа нь итгэл нэгт ахан дүүсийн эв нэгдлийг илэрхийлсэн сайхан жишээ болсон юм.

Мөн “Авралын гэрэл” сүмийн 2026 оны үйлчлэлийн баг албан ёсоор сонгогдож, хамтдаа библи судлал болон шаббат хичээлийг судлан, сүнслэг өсөлтөд анхааран ажиллахаар төлөвлөжээ. Сонгогдсон багийн бүрэлдэхүүнд:

Пастор – Од

Ахлагч – Дарханцэцэг

Санхүүч – Мэндцэцэг

Шаббат хичээлийн багш – Пунсал

Шаббат хичээлийн багш – Ариунтунгалаг

Эмэгтэй туслах – Хишигт

Эрэгтэй туслах – Ням-очир

Хүүхдийн багш – Элбэрэл

Залуучуудын ахлагч – Хишигбаатар гэх ахан дүүс тус тус томилогдсон байна.

Ийнхүү “Авралын гэрэл” сүм нь зөвхөн үгээр бус, бодит үйлчлэлээрээ Бурханы хайрыг олон хүний амьдралд хүргэсээр байна. Ахан дүүсийн эв нэгдэл, чин сэтгэлийн үйлчлэл нь итгэл найдвар түгээж, хайр халамжийн мэдрүүлсээр байна.  Ирэх он жилүүдэд ч энэхүү үйлчлэл улам тэлж, олон хүний зүрх сэтгэлд хүрнэ гэдэгт итгэлтэй байна.

Улаанбаатар төв сүм нь жил бүр уламжлал болгон Цагаан сарын өмнө хороо, дүүргийнхээ иргэдэд тусламж, дэмжлэг үзүүлсээр ирсэн билээ. Энэ жилийн хувьд сүмийн гишүүдийн зөвлөлөөс шийдвэрлэн ахмадын асрамжийн газарт очиж, бодитой үйлчлэл үзүүлэхээр болсон байна.

Тус үйлчлэлийн хүрээнд хувь хүний үүсгэн байгуулсан “Жаргалант эдлэн” ахмадын сувиллыг сонгон авч, асрамжид байгаа ахмад настнуудад нэг удаагийн ахуйн хэрэглэл болон өдөр тутмын хэрэгцээт зүйлсээр тусламж хүргэжээ. Асарч тойлох хүнгүй, хэвтрийн байдалтай 30 гаруй ахмадуудад хүрч үйлчилсэн бөгөөд энэхүү тусламж нь нэг удаагийн арга хэмжээ бус, цаашид тогтмол эргэх холбоотой хамтын ажиллагаа байхаар төлөвлөж байна.

Амгалан сүмийн гишүүн Л.Мөнх-Эрдэнэ нь 2007 онд Сайн мэдээг хүлээн авч, 2009 онд Усан баталгаан хүртэн, 2018 онд итгэл үнэмшлээрээ Адвентист сүмийн гишүүн болсон билээ. Тэрээр Библи дэх бидэнд зориулагдсан үнэ цэнтэй бичээсүүдийг уншин, Эзэн дотор эрүүл амьдрах арга замыг ухаарч ойлгон, Адвентист эрүүл амьдралын зарчмыг бодитоор хэрэгжүүлэхэд онцгойлон анхаарч амьдарсаар ирсэн байна.
“Миний ард түмэн мэдлэггүйгээсээ болж мөхөж байна” (Хосеа 4:6) хэмээх үг түүний зүрх сэтгэлд хүчтэй нөлөөлж, эрүүл амьдралыг мэдэн хэрэгжүүлэхэд улам бүр урам өгчээ.

Нэгэн үед жингийн илүүдлээс үүдэн өвдөг нь өвдөж, улмаар өвдөгний хагалгаанд орох заалттай болсон нь түүний амьдралын томоохон сорилт байлаа. Энэ цаг мөчөөс эхлэн тэрээр өдөр бүр Бурханд хандан:
“Сайн мэдээ хүргэгчдийн хөл юутай үзэсгэлэнтэй вэ” гэж хэлсэн байдагчлан “Хөлийг минь эдгээж өгөөч” гэж залбирсан юм.

2018 онд “САМ ЮҮК” их сургуулийн доктор, профессор И Жэ Юг Монголд ирж, “Хөлийн нум дэмжих улавч”-ийн талаар танилцуулан, байгалийн аргаар эрүүлжих боломжийн талаар зааж өгөөд зогсохгүй, үүнийг бизнес болгон хөгжүүлэх орлогоо Сайн мэдээнд зориулах тухай сурч авсан. Байгалийн аргаар эрүүлжих сургалт, номлолыг хүлээн авсандаа тэрээр гүнээ талархаж,“Эзэн Өөрийг нь хайрладаг хүмүүсийн төлөө бүгдийг сайнаар эргүүлдэг” (Ром 8:28) гэдгийг өөрийн амьдралаар батлан харжээ.

Профессор И Жэ Юг оношлогооны багажийг сургалтын үеэр түүний өмнө тавьсан нь Л.Мөнх-Эрдэнийн амьдралын мартагдашгүй мөч байлаа. Тэрээр “Бурхан намайг энэ үйлчлэлийг хийгээсэй хэмээн зөвшөөрч байна” хэмээн итгэн хүлээн авч, Хөлийн нум дэмжих улавчийг өөрөө хэрэглэж эхэлсэн байна. Үүний үр дүнд өвдөгний өвдөлт нь багасч, бүр хагалгаанд орох шаардлагагүй болсон төдийгүй, Эрүүл мэндийн зарчмуудаа амьдралдаа тууштай хэрэгжүүлснээр жин хасаж, бие галбиртай болоод зогсохгүй хүч тэнхээ сайтай болжээ.
“Чиний бие бол Ариун Сүнсний сүм мөн” (1 Коринт 6:19) гэдгийг тэрээр илүү гүн гүнзгий ойлгосон юм.

Хамгийн гайхамшигтай нь, “Хөлийн нум дэмжих улавч”-ийг борлуулах үйлчилгээг эрхэлснээр санхүүгийн хувьд ивээгдэж, Өвөрмонголд сайн мэдээний үйлчлэлийг дэмжин, Бурханы хайрыг хуваалцаж байна.

“Харин эхлээд Бурханы хаанчлал ба Түүний зөвт байдлыг эрэлхийл, тэгвэл энэ бүхэн чамд нэмэгдэн өгөгдөнө” (Матай 6:33) зарчмын дагуу амьдрахад Бурхан удирддаг.

Дэлхий дээр Адвентист хүмүүс урт насалж, эрүүл амьдарч байхад бид яагаад энэ гайхамшигт зарчмыг хэрэгжүүлж болохгүй гэж тэрээр бодон, Хөлийн нум дэмжих улавчийн ач холбогдлыг өөрийн биеэр мэдэрч, цаашид ч тууштай үргэлжлүүлэх ёстойгоо ойлгосон юм. Ар Монгол, Өвөр Монгол ахан дүүс, болон Адвентист сүмийн гишүүд ч гэсэн улавч хэрэглэснийхээ дараах үр дүнг хуваалцаж, урам зориг, итгэл найдвар өгсөөр байна.
МАЧ-ны 3 удирдлага сонгогдож, МАЧ-ны цаашдын үйл ажиллагааны чиглэлийн талаарх мэдээллийг авснаар Эрүүл мэндийг дэмжих энэхүү үйлчлэл нь үнэхээр зөв зам гэдгийг улам бүр ойлгожээ.

Иймд тэрээр Баруун 4 замд байрлах “Гайхамшигт хайр” сүм дээр оношлогоо, зөвлөгөө өгөх үйлчилгээгээ тасралтгүй үзүүлсээр байна.

Хэрэв та бүхэн Л.Мөнх-Эрдэнэ эгчтэй холбогдож, үйлчлүүлэхийг хүсвэл 9916-4376, 8681-4376 дугаараар холбогдоорой.

“Мөрч”хөгжилтэй аялагч клубын үйл ажиллагаа нь хичээлийн жилийн хуваарьтай уялдан эхэлж, жил бүрийн тавдугаар сард өндөрлөдөг.

2026 оны хичээлийн жилд Маранта, Хан-Уул, УБ төв сүмүүд хамтран хөтөлбөрүүдээ боловсруулж, хүүхэд багачуудын бие бялдар, оюун ухаан, сүнслэг төлөвшлийг цогцоор нь хөгжүүлэх зорилгоор хэрэгжүүлэхээр боллоо.

“Мөрч” хөгжилтэй аялагч клубын хөтөлбөрт 6-16 насны хүүхдүүд хамрагддаг бөгөөд одоогоор сургалтад идэвхтэй хамрагдаж буй 50 гаруй хүүхэд, 8 мастер гайд багш нар чин сэтгэлээсээ чиглүүлэн ажиллаж байна.

Энэхүү үйл ажиллагаа нь хүүхдүүдийг зөвхөн мэдлэгтэй болгохоос гадна зөв хүн болгон төлөвшүүлэхэд чиглэдэг.“Хүүхдийг явах ёстой замаар нь сурга. Тэр хөгширсөн ч түүнээсээ хазайхгүй.” (Сургаалт үгс 22:6)

А.Энхмаа : Таны оролцоо, итгэл, тууштай байдал нь зөвхөн тоо биш, харин Бурханы ажлыг дэлгэрүүлэхэд оруулах үнэлж баршгүй хувь нэмэр юм.

-Юуны өмнө МАЧ-ны Санхүүгийн даргаар сонгогдсонд баяр хүргэе. Та өөрийгөө товчхон танилцуулна уу?

А.Энхмаа : Намайг урьж, ярилцлага авах боломж олгосонд чин сэтгэлийн талархал илэрхийлье. Мөн энэхүү ярилцлагыг унших нийт уншигч, итгэгч ахан дүүстээ Эзэн Бурханы ивээл, удирдамж та бүхний амьдралд үргэлж дүүрэн байгаасай хэмээн ерөөе.

Монголын Адвентист Чуулганы санхүүгийн албыг хариуцан ажиллах хүндтэй бөгөөд өндөр хариуцлагатай үүргийг саяхан хүлээн аваад байна. Энэхүү ажлыг зөвхөн өөрийн мэдлэг, чадварт найдан гүйцэтгэнэ гэдэг боломжгүй тул Бурханы мэргэн удирдамж, хамтран зүтгэгчид, нийт итгэгч гишүүдийн дэмжлэг, оролцоонд тулгуурлан амжилттай хэрэгжинэ гэдэгт итгэл дүүрэн байна.

Өөрийгөө товч танилцуулвал намайг Авирмэд овогтой Энхмаа гэдэг. Би аав, ээжээс гурвуулаа. 2004 онд Ерөнхий боловсролын сургуулиа төгсөж, 2008 онд “Мандах” дээд сургуульд Хяналт-нягтлан бодогч мэргэжлээр бакалаврын зэрэг хамгаалсан.

Би итгэлийн ариун зам ороод хэдийн 22 жил болжээ. Бурханы үйлчлэлд 18 дахь жилдээ чин сэтгэлээсээ нэгдэн зүтгэж байна. Нөхөр, хоёр хүүхдийн хамт амьдардаг. Энэ хугацаанд Эзэн Бурхан намайг орхилгүй, харин олон сайхан хүмүүсээр дамжуулан удирдан чиглүүлж, шантрах, бүдрэх мөч бүрд урам өгч, дахин босгож ирсэнд нь талархал дүүрэн байна.

Бурханы үйлчлэл нь тэвчээр, тууштай байдал, итгэмжит зан чанарыг хүнээс ихээхэн шаарддаг хэмээн би итгэдэг. Иймд эдгээр үнэт чанаруудыг эрхэмлэн, хариуцсан үүрэг, үйлчлэлээ чин сэтгэлээсээ, хичээл зүтгэлтэйгээр урагшлуулан ажиллах болно.

-2026 онд ажиллах гол онцлох чиглэл тань юу байх вэ?

А.Энхмаа : Хэн нэгний заавар, чиглэл дор ажиллах нь нэг өөр ойлголт, харин тэрхүү заавар, чиглэлийг тодорхойлон өгдөг удирдлагын багийн нэг хэсэг байх нь илүү өндөр хариуцлага, бодлогын түвшний оролцоог шаарддаг билээ. Иймд цаашид урьд урьдынхаас илүүтэйгээр Эзэн Бурханы хүсэл зорилго, дуу хоолойг няхуур сонсож, аливаа шийдвэрийг ухаалгаар тунгаан хэрэгжүүлэхийг эрхэмлэн ажиллахыг зорьж байна. Хувь хүний байр суурь, онцлох байдлыг урьтал болгохоос илүүтэйгээр Чуулганы ойрын болон алсын бодлого, төлөвлөгөө, стратегийг хамтран боловсруулж, тэдгээрийг бодит ажил хэрэг болгон хэрэгжүүлэхэд дэмжин, уялдаа холбоотойгоор хамтран ажиллана гэж үзэж байна.

-Сүм чуулган руу чиглэсэн ямар ажил төлөвлөж байна вэ ?

А.Энхмаа : Монголд нийт 33 сүм байгаа ба тэдгээрийн ихэнхи нь 10 ба түүнээс дээш жил үйл ажиллагаагаа явуулж ирсэн байна. Манай сүмүүдийн хувьд өсөлт, амжилттай байсан он жилүүд ч байгаа мөн сорилт бэрхшээлүүдтэй жилүүд ч байна. Бидний маш их ярилцаж байгаа зүйл бол гишүүдийн оролцоог нэмэгдүүлэх, тэдэнтэйгээ хамтрах явдал юм. Тиймээс санхүү талын харааг нь илүү барьж ажиллах болохоор сүмүүдийнхээ санхүүгийн тал дээр нь мэдээлэл, зөвлөгөөгөөр хангах дээр анхаарч ажиллана. Сүмүүдийн санхүүгийн хараат байдлыг хэрхэн бие даасан байдал руу өөрчлөх вэ гэдэг дээр илүү бодож, төлөвлөж ажиллахыг зорьж байна.

-Сүмүүдийн санхүүжилт илүү ил тод, хүртээмжтэй болохын тулд ямар шинэ зохицуулалт хийгдэх вэ?

А.Энхмаа : Сүмүүдийн санхүүгийн байдал мэдээж ил тод, цаг хугацаандаа тайлан мэдээгээ тайлагнадаг байх ёстой. Өөрөөр хэлбэл хандив, өргөлийн мэдээ гишүүдэд жилд ядаж 1-2 удаа, сүмийн санхүүгийн орлого, зарлагын мэдээ дор хаяж 4-9 удаа сонгуульт зөвлөлдөө тайлагнадаг байвал сайн. Мэдээ, мэдээллээр хангагдаж байгаа гишүүн маань сүмийнхээ талаарх илүү сайн ойлголтыг, мөн өөрийн хийж чадах зүйлсийг тэрхүү мэдээллээс олж харж болно. Чуулганы ойрын болон алсын хараа бол нийгмийн олон хэрэгцээнд хүрэх байгууллага болон сүмүүдийг бий болгох. Эзэнийг дахин ирэх хүртэл бидний хийх хэрэгтэй зүйл олон байна. Үүнд хүрэхийн тулд бид санхүүгийн хувьд чадамжтай, гарцтай байх учиртай. Тэгвэл бидэнд байгаа нөөц боломж эсвэл бидэнд ирж болох тэрхүү боломжуудыг хэрхэн зөв зүйтэй, ухаалаг ашиглаж болох вэ, үүнээсээ үр шимийг хэрхэн бий болгох вэ гэдэг зүйлсийг бодож энэ тал руу чиглэсэн ажлуудыг хийх болно. Библийн Лук номны 14:28-30 дээр ийн хэлсэн байдаг : “Та нарын хэн чинь цамхаг барихыг хүсвэл эхлээд суугаад, үүнийг дуусгахтайгаа юу хэмээн зардлыг нь тооцоолохгүй вэ? Эс тэгвээс, суурийг нь тавьчихаад дуусгаж чадахгүйг нь харсан бүхэн түүнийг шоолж, “Энэ хүн барьж эхэлсэн ч дуусгаж чадсангүй” гэх болно.”

Тиймээс Эзэн дотор чадварлаг няравуудыг бий болгох, сургах, мөн хамтрах төлөвлөгөөтэй байна. Эзэн удирдана гэж итгэж байна.

-Нярав, Хэвлэл, ASI чиглэлийн уялдаа санхүүгийн тогтвортой байдлыг хэрхэн дэмжих вэ?

А.Энхмаа : Санхүүгийн удирдлагын ажлаас гадна дээр дурдсан хэлтсүүдийг давхар хариуцан ажиллахаар болсон. Энэ дашрамд, эдгээр үйлчлэлийг өнөөг хүртэл тууштай авч явсан үе үеийн удирдлагуудад чин сэтгэлийн талархал илэрхийлье. Түүнчлэн тухайн хэлтсүүдийн үйл ажиллагаа, хөтөлбөр бүрд өөрийн хувь нэмэр, оролцоогоо зориулж ирсэн нийт итгэгч ахан дүүстээ гүн талархал илэрхийлэх нь зүйтэй болов уу.

Өнгөрсөн хугацаанд хэрэгжиж ирсэн сайн туршлага, үр дүнтэй ажлуудыг тасралтгүй үргэлжлүүлэн, өнөөгийн нөхцөл байдалтай уялдуулан, нэгдсэн төлөвлөлтийн хүрээнд ажлаа хэрэгжүүлнэ гэж үзэж байна. Өмнөх асуултад дурдсанчлан Чуулганы хэлтэс бүрийн үүрэг, чиглэл, хэрэгжүүлж буй үйл ажиллагаа хоорондын уялдаа холбоог тодорхой харуулах нь чухал бөгөөд ингэснээр Чуулганы нэгдсэн зорилго, алсын хараа бодит биеллээ олох юм.

Иймд дээрх гурван хэлтэс нь чуулган, орон нутгийн сүмүүд болон институцуудийн эрхэм зорилгыг хэрэгжүүлэхэд бодит дэмжлэг үзүүлэх чиглэлд үйл ажиллагаагаа төвлөрүүлэхээр зорьж байна. Үүний зэрэгцээ эдгээр хэлтсийн хүрээнд хэрэгжих сургалт, мэдээ мэдээллийг орон зай, цаг хугацааны хязгаарлалтгүйгээр, хаанаас ч хэзээ ч хүртээмжтэй байлгах зорилгоор цахим орчинд зохион байгуулах төлөвлөгөөтэй байна.

-Итгэгчдийн өргөл, хандивын үр өгөөжийг бодитоор нэмэгдүүлэхэд ямар бодлого баримталж байна вэ?

А.Энхмаа : Библи дээр Бурханы ажил маш олон хүмүүсийн, маш олон янзын оролцоо дэмээр явагддаг болохыг бид ажиглан харж, ойлгож болно. Адвентист Чуулганы хувьд нийт 33 сүм, тэдгээрийн итгэгч гишүүд мөн Чуулганы харъяаны байгууллагуудаас хандив өргөлийг хүлээн авч үүнийг бид Монголын болоод дэлхийн сүмийн сайн мэдээний үйлчлэлд зориулан хэрэглэдэг. Өнгөрсөн 5 жилийн хугацаанд (2021-2025) Аравны нэг өргөлөөр 79,6%, харин хандив 15,4%-н өсөлттэй байна. Энэ дашрамд өргөл, хандивтаа итгэмжтэй, хариуцлагатай, оролцоотой байдаг бүх гишүүд болоод байгууллагууддаа талархаж байгаагаа хэлмээр байна. Магадгүй гишүүд маань хандив өргөлийн өсөлт, түүний өгөөж үр дүнг харахыг хүсэж байгаа бол та өөрийн хамрагддаг сүмээ, эсвэл ажиллаж байгаа байгууллагаа, мөн чуулганаа нэг хараад, ажиглаад үзээрэй. Хэрэв танд илүү зүйлс хиймээр, бүтээмээр, магадгүй олон хүнд хүрмээр, засмаар, янзалмаар, сайжруулмаар зүйлс байна гэвэл гишүүн бүр, байгууллага бүр өргөл, хандивтаа итгэмжтэй байсан шигээ тууштай хэвээрээ байгаарай гэж хэлмээр байна. Мэдээж дээрх өсөлтийн үр өгөөж Бурханаас ирсэн хэвээрээ байгаа. Бидний үйл ажиллагаа тогтвортой явагдсаар байна, бүтээн байгуулалт, хөгжүүлэлтүүд хийгдсээр л байна.

Хэн нэгэн хүн, нэг хэлтэс, эсвэл байгууллага л энэ санхүүгийн өсөлтийг бий болгох гэж оролдож байж болох ч, үнэн хэрэгтээ хамгийн чухал нь үүнд оролцож буй та өөрөө юм. Та өргөл, хандивынхаа үнэ цэнэ, утга учир, үр нөлөөг амьдрал, үйлсээрээ мэдэрч байна уу гэдэг нь л бодит ач холбогдолтой. Үүнийг гүнээ ойлгосон хүн, хэн ч юу гэж хэлсэн байсан, эсвэл өнөөдөр ямар нэг сорилт тулгарсан байсан ч, өргөл, хандив, оролцоогоо тууштай хадгалж чадна.

Бид чуулганы зүгээс гишүүддээ зориулан мэдээ, мэдээлэл, сургалт, семинарыг бэлтгэн хүргэх бөгөөд энэ бүх хамтын хүчин чармайлт бид бүгдэд урам зориг, итгэл найдвар бэлэглэн, хамтдаа урагшлах замыг гэрэлтүүлнэ.

Таны оролцоо, итгэл, тууштай байдал нь зөвхөн тоо биш, харин Бурханы ажлыг дэлгэрүүлэхэд оруулах үнэлж баршгүй хувь нэмэр юм. Тиймээс хамтдаа, зүрх сэтгэлээ нийлүүлэн, шинэ үр дүн, шинэ амжилтыг бүтээцгээе.

-Төгсгөлд нь нийт итгэгч ахан дүүсдээ хэлэх үг болон мэндчилгээ дэвшүүлнэ үү?

А.Энхмаа : Дараах Библийн ишлэлээр би та бүхнийг мөн өөрийгөө урамшуулан, зоригжуулахыг хүсэж байна:

“Би сайн тэмцлээр тэмцсэн. Би замаа дуусгасан, итгэлээ сахисан. Ирээдүйд зөвт байдлын титэм нь надад зориулагдан зэхэгдсэн ажээ. Зөв шударга Шүүгч болох Эзэн намайг, зөвхөн намайг ч биш, Түүний үзэгдэхийг хүсэн хүлээгч бүх хүнийг бас түүгээр шагнах болно.” / 2 Тимот 4:7-8 /

Эцэст нь хэлэхэд, төгс зүйл гэж байхгүй. Учир нь бид бүгд гэмтэй, алдаатай. Биднийг дахин өөрчилж, шинэчлэх хүртэл Бурханы хүмүүст олон сорилт тэмцэл тулгарах болно. Гэхдээ хичээж, зүтгэж, оролдож, итгэмжтэй, тууштай явсан хүн бүр л шагнал хүртэх нь ойлгомжтой.

Тиймээс итгэлээ тууштай сахин, амьдралаараа харуулцгаая!

Эцэст нь, миний ярилцлагыг уншиж цаг гаргасан та бүхэнд чин сэтгэлийн талархлаа илэрхийлж байна.

Бурханы аврал, нигүүлслийн сайн үйл, аз жаргал таны болон таны гэр бүлийн амьдралд дэлгэрэх болтугай.

Ярилцсан : Ц.Хишигжаргал

Харилцаа Холбооны хэлтэс 2026.01.12.

Амгалан сүмийн гишүүн Г.Үүрийнтуяа 2025 оны 11 дүгээр сарын сүүлээс 12 дугаар сарын эхний өдрүүдэд Эрээн хот болон Өвөр Монголын таван хошуугаар айлчлан, нийт 22 хүнд Бурханы сайн мэдээг тунхагласан нь үр жимс арвинтай үйлчлэл боллоо.

Тэрээр Өвөр Монголын итгэгч ахан дүүст аудио Библийг түгээж, Бурханы арван хууль, мөн өргөл хандивын үнэ цэнийн талаар хуваалцсанаас гадна эрүүл мэндийн үйлчлэл үзүүлсэн юм. Ялангуяа Тунгги алтан зүүний эмчилгээ нь олон хүнд бодит үр дүнгээ өгч, итгэл найдвар, талархлыг төрүүлжээ.

Аудио Библи буюу Өвөр Монгол ахан дүүсийн нэрлэдгээр “Шингээлт” төхөөрөмжид Агуу тэмцэл, Христэд хүрэх зам, Бурхан Аавын захиа, Үе үеийн хүслэн зэрэг номуудыг суулгасан бөгөөд эдгээрийг Өвөр Монголын итгэгч Эрдэмтөв босоо монгол бичгээр хөрвүүлэн илгээсэн байна. Тэрээр өглөө бүр 03:45 цагт босон сонсож, нягтлан буулгасан бөгөөд уг бүтээлүүдийг хэвлэн гаргах чин хүсэлтэй байгаагаа мөн уламжилжээ. Тэрээр Матай 6:33 ишлэл болох “Харин эхлээд Бурханы хаанчлал ба зөвт байдлыг нь хайгтун. Тэгвэл энэ бүхнийг та нарт нэмж өгөх болно” гэсэн Бурханы амлалтанд өдөр бүр талархан итгэмжтэйгээр судалж байна.

Аудио Библийг хүлээн авсан итгэлийн ахан дүүс “Итгэл минь улам батжин, Бурханы үгийг илүү ихээр шимтэн сурах болно” хэмээн талархлаа илэрхийлсэн юм. Түүнчлэн “Христэд Монголын төлөө” баяр мэдээний хүрээнд хэвлүүлсэн Библийг гардан авсан итгэгч ахан дүүс баяр хөөр дүүрэн сэтгэлээр хүлээн авлаа.

Энэхүү айлчлалын бодит үр дүн нь сэтгэл догдлуулж, нэг хүн усан баталгаа хийлгэх шийдвэр гаргасан бол хоёр гэр бүл арван хувийн өргөл хандив өргөхөөр шийдсэн нь Бурханы ажил амьд, үр жимстэй байгааг илтгэх тод жишээ боллоо.

/Еврей 11:1 Итгэл бол бидний найддаг зүйлсийн бодит байдал, харагдахгүй зүйлсийн баталгаа юм./

Мэдээ бэлтгэсэн : Ц.Хишигжаргал

Харилцаа Холбооны хэлтэс 2026.01.08